منتديات بروجروماتيك التعليمية

[مهم] عبودة مجدى كسب 110 دولار لو عايز تكسب زيه شوف الموضوع و زود أرباحك

اذهب الى الأسفل

[مهم] عبودة مجدى كسب 110 دولار لو عايز تكسب زيه شوف الموضوع و زود أرباحك

مُساهمة من طرف عابر سبيل في الأربعاء أبريل 27, 2016 12:22 pm

[ندعوك للتسجيل في المنتدى أو التعريف بنفسك لمعاينة هذا الرابط]



بيحكى عبودة و بيقول


Aboda Magdy‎دي أول دفعة فلوس تجيبلي من شغلي علي النت ، أنا كنت متفق مع صديقي وحبيبي " ربنا " أني أول ما هتيجيلي أول دفعة هكتب بوست فيه أزي كسبت الفلوس دي وايه الطرق الحقيقية اللي اعرفها وممكن تحقق لك دخل محترم ....

أولاً أنا حققت الفلوس دي من الموقع دا : [ندعوك للتسجيل في المنتدى أو التعريف بنفسك لمعاينة هذا الرابط] ، ازي ؟ أنا بكتب مقالات وبنشر مقالات .. فيه جمهور من الناس بيحب يقرأ بيدخل الموقع بيقرا المقالات دي ، وأنا بكسب من الإعلانات المعروضة في الموقع ، والـ 110 دولار اللي انا متصور معاهم دول دي أرباحي من إعلانات جوجل أدسنس أحد فروع عالم جوجل ، وفيه إعلانات شركة عربية إسمها حاسوب حاطت إعلانتها في موقعي من فترة قليلة وليا عندهم 10 جنية إسترليني بس وأول ما يكملوا 50 جنية بقدر أسحبهم ..

ثانياً: عاوز أقولك صفحات الفيس بوك الكوميكس وصفحات أفضل كومنت أو أفضل تويتا أو المشاكل الاجتماعية أو .. أو ... كل الصفحات دي بتكسب كويس وشغال فيها جروب شباب وبنات .. كويس انك تتابعهم وتضحك أو تقرا التويتا المختلفة بس تفضل كدا طول عمرك دي مشكلة !؟ ضحكتك هتبقي ميتة وملهاش طعم وأنا متاكد أنت فاهمني ! .. لازم تكون أنت الأولوية في حياتك ، وبلاش تتبع سياسة المجتمع العربي المريض دا وهي ( التسلية حتي الموت ، هروباً من المشاكل والأسئلة التي تنفجر بداخلك ! وهروباً من الواقع ومسؤولية حياتك وأنك لازم تنقذ نفسك من الخراب وتاخد بإيديها للمكان اللي انت تستحقه وقلبك عاوزه )

ثالثاً: وأنا بسحب الفلوس سألت الموظف هو فيه ناس من أسيوط بتجيلها دفعات من جوجل قالي اه فيه كتير !! .. أنا فرحت وزعلت .. فرحت أن فيه ناس بتكسب وزعلت لأن الموضوع بردوا ليسه صغير ومنتشرش بقوة زي المغرب مثلاً !! .. أكيد خوف من الحسد والسحر والهبل دا .. نفسي نفهم أن ربنا جابنا للعالم دا مش للأكل والشرب واننا نكره بعض ونحارب بعض لأننا مختلفين! ونمارس الجنس ونتكاثر وبس !! ، ربنا جابنا عشان نتشارك الأفكار والمشاعر والحياة ونكبر بعض ونساعد بعض ونحتضن بعض .. مشكلة مصر فقر القلوب .. فقر الأفكار والمشاعر وبصراحة أحنا أغني ناس في الفقر دا زي ما قال الجوكر في أغنية " باقة " .. الفرق بين الدولة المتقدمة والمتخلفة ، المتقدمة بتنتج أفكار ومشاعر صالحة وجيدة ، والمتخلفة بتنتج أفكار ومشاعر فاسدة وغير صالحة للإستعمال الآدمي .. والفرق بين الغني والفقير الأفكار والمشاعر بردوا .. وأنك تتولد في بيئة أو مجتمع فقير دا عادي أما أنك تعيش طول حياتك في الفقر دا كدا مش عادي وكدا أنت مريض ومحتاج أنك تتعالج ..

المهم دلوقتي أيه طرق ربح المال من النت ؟

1- المواقع الإلكترونية والموقع أشبه بالمشروع التجاري أو المحل التجاري ولكنه علي النت ، والمواقع نوعين .. نوع بيقدم معلومة ونوع بيقدم خدمة ..

نوع بيقدم معلومة زي موقعي ، موقع ثقف نفسك ، مواقع أخبار الكورة والسياسية والإقتصاد وكدا .. أما النوع اللي بيقدم خدمة زي جوجل أو الفيسبوك أو أوليكس أو ...

دي مجموعة من المواقع العربية الناجحة اللي بتقدم معلومة وقائمة عليها مجموعة من الشباب والبنات أو شباب بس او بنات بس ..
موقع أخباري وطني: [ندعوك للتسجيل في المنتدى أو التعريف بنفسك لمعاينة هذا الرابط]
موقع ثقف نفسك: [ندعوك للتسجيل في المنتدى أو التعريف بنفسك لمعاينة هذا الرابط]
موقع اقتباسات: [ندعوك للتسجيل في المنتدى أو التعريف بنفسك لمعاينة هذا الرابط]
موقع هل تعلم: [ندعوك للتسجيل في المنتدى أو التعريف بنفسك لمعاينة هذا الرابط]

ودي مجموعة مواقع بتقدم خدمات ..
أوليكس: olx.com.eg
مجموعة من الشباب والبنات المصريين عملوا الموقع دا من كام سنة كدا وكان اسمه دوبلز .. المجال اللي دخلوا فيه كان صعب جداً وكان فيه منافسين كتير وشركات قوية .. بعد فترة صغيرة الموقع بالفعل كبر وفكرتهم كبرت معاهم .. وغيروا أسمه موقعهم لـ أوليكس .. والفترة اللي فاتت عملوا حملة إعلانية واحدة بأكثر من ربع مليون جنية علي الأقل .. والموقع بيحقق لهم أرباح محترمة ..

أمازون : [ندعوك للتسجيل في المنتدى أو التعريف بنفسك لمعاينة هذا الرابط]
تعالي أحكيلك بسرعة قصة موقع أمازون العملاق الذي لا يقل أهمية عن موقع جوجل والفيسبوك في مجال وهو البيع والشراء .. ، سنة 1994 واحد اسمه Jeff Bezos كان عنده 30 سنة بيشتغل في البورصة وبيكسب كويس بس حس بالكآبة والفراغ وانه بيضيع حياته في المكان الغلط ، ( اتجنن في نظر الناس بس عقل في نظر قلبه ) وقدم استقالته قعد فترة من غير عمل ، وبعد كدا قرر أنه يعمل موقع بيع وشراء المنتجات علي النت وكان ساعتها جوجل ليسه صغير والنت بردوا أهميته قليلة .. استلف من أبوه وأمه 600 دولار لأنه مكنش معاه فلوس خالص .. طلب من مصمم مواقع أنه يصمم له الموقع بتاعه لأنه لا يعرف شيء عن عالم المواقع والبرمجة .. من سنة 1994 لحد سنة 2000 الموقع لم يربح دولار واحد ! ، كل ما يأتي للموقع من أموال كانت تصرف علي الموقع وتطويره وتحديثه وفقط .. ولم يربح جيف طوال هذه الفترة دولار واحد فقط ! ..

في سنة 2001 كانت أول سنة يحقق فيها جيب ربح صافي وكان 5 مليون دولار ، آخر تقرير عن أرباح أمازون من حوالي سنتين أو أكثر .. أمازون بيحقق عائد سنوي 61 مليار دولار ، في الشهر: 5 مليار دولار ، في اليوم بيحقق: 166 مليون دولار ، في الساعة: 7 مليون دولار ، في الدقيقة: 116 ألف دولار ، في الثانية: 1950 دولار .. أحيه .. شوفت في الإحية دي هو كسب 1950 دولار .. أحيه كمان عشان أرباحه تزيد

جيف حالياً اشتري أكثر من 44 شركة عشان يكبر فكرته ( أمازون ) .. ربنا يوفققه ...

دول مواقع خدمات عربية ..
أي خدمة: [ندعوك للتسجيل في المنتدى أو التعريف بنفسك لمعاينة هذا الرابط]
خمسات: [ندعوك للتسجيل في المنتدى أو التعريف بنفسك لمعاينة هذا الرابط]
وفيه مواقع كتير جداا بس دي امثلة بسيطة ..

2- عن طريق قنوات اليوتيوب ..
بتقدم محتوي علي شكل فيديوهات ، ناس بتدخل تتفرج عليها وأنت بتكسب من الإعلانات اللي بتظهر في بداية الفيديو وعلي شمال الفيديو .. أمثلة للقنوات دي ..

اسم القناة غريب: [ندعوك للتسجيل في المنتدى أو التعريف بنفسك لمعاينة هذا الرابط]
2 مراهق اعتقد من المغرب .. بيعملوا مقالب أو أي هبل وخلاص .. الأرباح اللي كسبوها لحد دلوقتي اكتر من اللي ابوك وامك كسبوها طول حياتهم ...

بوليوود عربي: [ندعوك للتسجيل في المنتدى أو التعريف بنفسك لمعاينة هذا الرابط]
2 شاب مغربي + فتاة مغربية .. بيحبوا السينما الهندية .. عاملين القناة دي بوليوود عربي + موقع بيتكلم عن أخبار السينما الهندية وهو دا: [ندعوك للتسجيل في المنتدى أو التعريف بنفسك لمعاينة هذا الرابط] ، بيكسبوا كويس جداً ... المغاربة يتعبروا من أكتر العرب اللي بيكسبوا علي النت ...

شادي سرور: [ندعوك للتسجيل في المنتدى أو التعريف بنفسك لمعاينة هذا الرابط]
اعتقد انك تعرفه ، ولو مش تعرفه ادخل اتفرج علي قناته واعرف ..

نور: [ندعوك للتسجيل في المنتدى أو التعريف بنفسك لمعاينة هذا الرابط]
اعتقد مغربية بتعمل فيديوهات مختلفة ومنوعة وجميلة والناس بتحبها ..

الحكاية: [ندعوك للتسجيل في المنتدى أو التعريف بنفسك لمعاينة هذا الرابط]
مجموعة من شباب وبنات القاهرة بتنزل تصور فيديوهات في الشارع ، قناة ليسه جديدة ..

دوت مصر - احمد رأفت: [ندعوك للتسجيل في المنتدى أو التعريف بنفسك لمعاينة هذا الرابط]
أعتقد بردوا شوفت فيديوا انت ليه علي الفيس .. فكرته حلوة زي تقارير في الشارع ..

رنا استايل: [ندعوك للتسجيل في المنتدى أو التعريف بنفسك لمعاينة هذا الرابط]
بنوتة اسمها رنا بتعمل فيديوهات عن المكياج والاستايل للبنات ..

الفن بوليود: [ندعوك للتسجيل في المنتدى أو التعريف بنفسك لمعاينة هذا الرابط]
فتاة مغربية بتحب السينما الهندية وبتعمل فيديوهات حلوة بأسلوب جميل وعاملة موقع عن أخبار السينما الهندية .. بتكسب من الاتنين القناة والموقع ..

متع عقلك: [ندعوك للتسجيل في المنتدى أو التعريف بنفسك لمعاينة هذا الرابط]
أم إيه تيوب: [ندعوك للتسجيل في المنتدى أو التعريف بنفسك لمعاينة هذا الرابط]
القناتين دول فيه زيهم كتير .. وشغلهم يعتبر بسيط .. بتابع مواقع أجنبية كبيرة ، بتنزل مواضيع وأخبار مختلفة عن الفنانين أو عن حاجة معينة او غربية أو معلومة جديدة عن الإنسان أو عن الحياة ... انت بتاخد الخبر وبتظبطه كأسكربت .. وبتسجل الاسكربت دا بصوتك وبعد كدا بتركب صوتك علي فيديو مكون من صور وفيديوهات صغيرة بخصوص الموضوع اللي انت بتتكلم عنه .. من أسهل الأفكار .. محتاج بس تتعلم فوتوشوب ومونتاج .. ودول متاحين جداً علي النت ..

3- عن طريق بيع الخدمات...
فيه شاب مصري في حي فقير في الجيزة جمب الأهرامات شغل قلبه شوية ، من فكرة بسيطة جداً كسب 10 ألف دولار خلال سنتين .. والمبلغ في زيادة .. كل اللي بيعمله بيقدم خدمة في موقع أجبني بسيطة جداً ، الخدمة : أنت عندك موقع او شركة او معطم او محل .. وعايز تسوقه .. فبتبعت اسمه والشاب دا بيكتبه علي لوحة ورقية كبيرة ويتصور بيها قدام الأهرامات مقابل 5 دولار بس .. طبعاً فيه ناس كتير طلبتها منه لأن 5 دولار مبلغ بسيط لو صاحب الشركة أو المحل دا عمل كدا بنفسه أو طلب من احد مواظفيه أنه يعمل كدا ويسفره علي حساب الشركة .. ممكن تعرف أكتر عنه اقرا المقال دا: [ندعوك للتسجيل في المنتدى أو التعريف بنفسك لمعاينة هذا الرابط]

في موقع خدمات عربي اسمه خمسات [ندعوك للتسجيل في المنتدى أو التعريف بنفسك لمعاينة هذا الرابط] ، أي خدمة تقدر تقدمها.. فيه شاب في سوريا كسب أكتر من 700 ألف دولار .. وفيه عراقي كسب اكتر من نص مليون دولار .. وسوريا والعراق خراااب ولكنهم لم يقبلوا بالخضوع للواقع وصنعوا حياتهم .. ادخل وخد لك لفة في الموقع .. وأبحث اكتر علي اليوتيوب وجوجل واعرف اكتر عن الموقع وازي تكسب منه فيه مئات الفيديوهات والمقالات اللي بتتكلم عنه .. طبعاً فيه مواقع خدمات كتيير .. بس بردوا دول مثالين بس .

4- أنك تتعلم برمجة تطبيقات أندرويد أو برمجة مواقع إلكترونية ... وتقدم خدمات عن طريق النت .. وتقدر تتعلم كل حاجة عن البرمجة أو عن أي شيء علي النت بأي لغة أنت تحبها .. حتي لو حابب تفجر بيتكم أو السيسي هتلاقي مرادك يا حبيبي

وفيه طرق كتيير تانية .. المهم لو أنت لو ليسه بتدرس وعندك امتحانات زيي بعد شهر وحابب تشارك في مسرحية الامتحان تمام وأنا كمان هعمل كدا حابب ألعب معاهم .. تقتدر ترجع للبوست دا علي صفحتي الشخصية أو أحتفظ بالكلام دا في Text ويبقي ارجع له في الأجازة .. قدامك 3 شهور وجرب ومش هتخسر حاجة يا سكر 

الواقع زبالة وماما وبابا مش فاهمينك ومش حاسين بيك والمجتمع قذر وبيقتل فيك بالبطيء والسيسي أحا .. دا التعليق المناسب حين يذكر السيسي والسياسة  .. بس عاوز أقولك حاجتين أولاً كل دا ملوش لازمة وكل دي شماعات ، الحقيقة بقا أنت ضعيف وجبان ومريض وأفكارك فقيرة وفاسدة زي المجتمع اللي نشأت فيه ، ثانياً ربنا لم ياتي بك لهذه الواقع ولم يعطيك تلك الحياة لتخضع للواقع وإنما لتصنع واقع جديد ومميز وفريد من صنع ألحان نبضات قلبك ..

المجتمع العربي والمصري بالخصوص فقير جداً وانت عارف كدا وفي نفس الوقت مش حابب تطلع برا الصندوق وجبان .. مفيش حل إما تتحمل مسؤولية حياتك وتطلع برا الصندوق أو تموت بالحيا معاهم ! ، المجتمع دا اكتر مجتمع فيه شرك بالله صريح وواضح وأكتر ناس بتعبد أصنام ( علي شكل أهل ورجال دين وكتب تراثية ورجال سياسة والواقع والناس والشكل العام .. ) ، وأكبر مجتمع أحمق ولا يعرف قيمة أي شيء بما فيه الإنسان ولا يفهم سوى المال وترديد أفكار الأسياد والكبراء ، ومجتمع فيه ظلم وقهر لكل ما هو ضعيف ، أي إنسان قوي بيظلم اللي اضعف منه .. ودا بيبدأ من الأسرة المؤسسة الميتة واللي بتطلعلنا أمثال السيسي والوزراء والسياسيين والفاسدين ...

بقولك كدا ليه ؟ عشان اعرفك انا عارف كل دا .. عاوز تموت معاهم بالحيا اتفضل دي حياتك .. بس خليك عارف المجتمع دا قدامه من 50 لـ 100 سنة عشان يبقي دولة محترمة هو بيعدي بنفس المرحلة اللي عدت بيها أي دولة محترمة حالياً .. وخلال الـ 50 سنة دول اللي عيشين فيها هيكون أغلبهم كبش فداء للتغيير وتكسير الأصنام لجعل الإنسان يتحرر بعض الشيء ويرجع لمصدره .. فياريت تكون أنت واحد من اللي يساعد علي التغيير واللي يدي شعلة نور لأبناءه والأجيال القادمة .. مش تكون مثال وعبرة للحماقة والجهل والغباء ..

المهم بقا يا سيدي .. عاوزك تدور علي الحاجة انت بتحبها .. بلاش يكون رقم واحد الفلوس خلي رقم واحد السعادة او الشغف او الحب .. ولما تحس بالسعادة والشغف والحب تجاه فكرة معينة .. هي دي اللي تعملها .. انا بس شاركت الطرق دي عشان تعرفها وتجربها وممكن تفيدك .. أما الأساس في الحياة خليه الشغف وقلبك عاوز ايه ؟ مش الفلوس !!

المعادلة الطبيعي والصحي للمال ( أولاً تتبع قلبك وشغف وإحساسك وفقط .. ثانياً بتبذل مجهود كبير جداً تجاه الفكرة اللي قلبك اختاراه .. ثالثاً المال بيجيلك لوحده وأكتر مما تتخيل وبيفضل يزداد + أن الفرص بتزداد قدامك )

علي فكرة جوجل والفيسبوك وأمازون وبيل جيتس عملوا كدا .. فأنا مش عاوزك تضع هدف أنا عاوز تتبع قلبك .. وقلبك هيشاورلك علي فكرة .. والفكرة هتتكاثر لأفكار أكثر ... ومال أكثر .. والأهم أن الرحلة كلها السعادة في ازدياد ..

الـ 110 دولار دول كلام فاضي أنا شغال بقالي سنة ونص لوحدي .. امال فيه المكسب بتاعي ؟

أولاً: الموقع زي المشروع كل شوية بيكبر اكتر .. وخلال 6 شهور هيبدأ يجيب لي حوالي 150 دولار في الشهر .. كبداية طبعاً لأن المواقع بتكبر ..
ثانياً: جات لي فكرة موقع تانية محتاجة مني شغل من 3 لـ 6 شهور وهتجيب لي في حدود 200 دولار كبداية .. بس الفكرة أساسها مادي عندي مش حب ، وأنا مكبر دماغي منها خالص حالياً ..
ثالثاً والأهم والأجمل والأروع .. جات لي فكرة 4 كتب أنا حاسس انهم هيقلبوا الدنيا والفكر العربي وهيقعدوا علي الأقل 50 سنة بعد ما أموت .. وأنا بالفعل بدير الموقع وبتكب في كتابين ! .. الكتب هي ..

1- رواية رحلة طفل يبحث عن حياة ( بتتكلم عن الجنس والدين والحياة .. والمفروض أنك كل لما تكبر سعادتك وراحتك يزيدوا مش يقلوا .. أنا عارف ان في مصر الطفولة مشردة وضرب وإهانة .. ومن 18 سنة بيبدأ سن اليأس والألم والمعاناة لحد الزواج .. وبعد الزواج بتبدأ معاناة بشكل جديد ومختف .. يعني الحياة كلها معاناة ودا أسلوب حياة المصري .. وأنا ضده .. أنا شايف أن الإنسان كل لما يكبر كل لما يعرف نفسه أكتر ويعرف ربنا اكتر ويعرف الحياة اكتر فيعيش سعيد أكثر وأكثر .. وحب اكثر واكتر .. )

2- قوانين حياة من القرآن ( القرآن العرب حولوه لكتاب موت .. أما هموتك بالسلاح زي داعش أو أنصار بيت المقدس او السيسي واللي عمله في ماسبيروا وفي شباب الأخوان وغيرهم من احداث حصلت في مصر وبرا مصر .. وأما هموتك بالحيا سواء كنت شاب أو بنت .. وهقولك ربنا هو اللي بيقول كدا مش انا !! .. ودا بعد الإنسان العربي المسلم تماماً عن القرآن وبيكتفي أن يشغله في الجنائز لأنه كتاب موتي أو انه يقراه بسرعة في رمضان وكأنه داخل مراثون !! )

3- الحب الطبيعي حياة لا المسموم ( الحب في حياة المجتمع العربي لا يتعدي 3 جمل .. إما عبودية يعني أنا هحب شخص حتي العبادة ، وإما إستعباد يعني أنا هستعبد شخص بقوتي وأقوله أنا بحبك ، وإما الجنس .. والتلت معاني ملهمش علاقة بالحب من قريب ولا بعيد وإنما هي مجرد أمراض إجتماعية فقط .. وهتكلم عن الحب الصحيح السليم اللي يديك القوة ويساعدك إنك تكبر ويزيد سعادتك وراحتك ونجاحك )

4- في قلبك الحياة .. ( أغلب الناس ماشية برؤوسهم والرأس عبارة عن كارت ميموري مبرمج من الأهل والمجتمع وكل الأفكار اللي فيه ميتة .. ودا سبب بؤسهم .. القلب فقط هو أساس كل شيء له قيمة بما فيها الحياة .. وهتكلم عن الحدس أو البديهية أو صوت الروح ... بشكل مفصل وإزي هو دا مصدر الإبداع والتميز والحياة السعيدة للإنسان )

والكتب لما هنشرها هرفعها نسخ pdf علي موقع خمسات وهبيع النسخة ب 5 دولار أو اكتر لناس متابعين موقعي وبيكلموني شخصياً ومعجبين بأفكاري وموقعي ومستنين كتبي بس هم في بلجيكا والمانيا ولندن وامريكا .. ودي أفضل طريقة عشان الكتاب يوصلهم هناك .. وكمان يعتبر تسويق إلكتروني لكتابي .. وكمان دا مصدر ربح تاني ..

عاوز انصحك شوية ممكن ..
أولاً لما تتجوز ياريت متجيبش أولاد علي طول أقعد من 5 لـ 10 سنين من غير أطفال .. 1- خلال الفترة دي سافر أنت وشريك حياتك علي قد ما تقدر جوا مصر وبرا مصر واتفسحوا وكونوا بينكم علاقة صداقة قوية .. 2- ساعدوا بعض إنكم تنجحوا بعض وإن كل واحد يلاقي نفسه وقلبه وحلمه وساعدوا بعض إنكم تحققوا الأحلام دي .. 3- أتخلصوا من عقد الطفولة والمجتمع أنا عارف ان التربية كانت سيئة ولحد دلوقتي وحشة .. ودا فترة كويسة عشان لما تجيبوا اطفال تعرفوا تربوهم وتعرفوا تكونوا سعداء معاهم وتكونوا ناجحين وتقدروا توفرولهم حياة هادئة بعيداً عن أمراضهم النفسية أو عقد الطفولة ..

بعد لما تجيب أولاد ياريت يكون دا ترتيب الحاجات اللي محتاجة اطفالك .. 1- الحب الطبيعي .. 2- السكن والأكل والشرب .. 3- دي جزء من الحب وهي أنك تساعده في الحاجات اللي هو بيحبها وتوفرها له وتساعده انه ينجح فيه ولو فشل أو ضعف انت تحتضن ضعفه وفشله دا مش تعايره بضعف أو بفشله وتقوله أنت السبب لأنك مش تبعت كلامي ومش رضيت تبقي كلب مطيع ليا .. ياريت تعامله كإنسان مستقل مش كلب .. وإلا متجيبهوش للدنيا وتعذبه عشان الدنيا هتعذبك وهتخبط فيك لحد لما تموت وخير مثال أنظر من حولك للمجتمع المصري .. 4- أنك تخليه يسافر كتير ويشوف ثقافات ودول مختلفة .. 5- التعليم الأكاديمي ودا ملهوش لازمة خااالص ولو آثر علي أي حاجة من اللي فاتوا .. قعدوا في البيت ومتخلهوش بيتعلم .. انا عن نفسي ابني او بنتي هعلمهم لحد 6 ابتدائي علي الاكثر .. وانا كنت واحد من 6 ابتدائي لحد 2 ثانوي بيطلع الأول أو التاني علي المدرسة .. يعني كنت أحسن الحمير طول عمري

دي جزء من النصايح اللي هكتبها في الرواية عن الزواج وكدا .. وصحيح ياريت تطلع من عالم الأفلام الإباحية والعادة السرية .. كلنا عارفين أننا ( شباب أو بنات عزاب أو متجوزين ) من أكتر المجتمعات اللي بتمارس العادة السرية وبتتفرج علي الأفلام إباحية .. وسيبك من هبة قطب والكلام الفراغ اللي بتقوله أنك عادي تمارسها مرة واحدة عشان الكبت الجنسي اللي عندك .. انت فيه مشكلة ظاهرة وهي الواقع والزواج وانهم بيعاملوك كحيوان وكتاجر وأن الزواج أشبه بالدعارة بس المقننة من غير فلوس مفيش جنس والكلام القذر دا ! .. بس المشكلة الحقيقية هو تفكيرك الجنسي .. الجنس غريزة ومرتبطة بالإحساس وبالقلب .. هم بيحولوا الجنس لمسألة فكرية عقلية .. وهنا المشكلة ..

زي الأكل بالظبط غريزة .. لما بتجوع بتاكل ودا الطبيعي .. الشخص السمين ايه سبب انه بقا سمين ؟ .. انه بيفكر في الأكل وكل لما تلاقى الشخص أسمن كل لما الشخص بيكون سمين أكتر لحد لما بيموت من كتر الأكل ! .. ودا مرض .. والجنس كذلك .. حاول تملى حياتك بالحب والرومانسية .. وأعرف أنك أصلاً اتخلقت بعد إنتهاء علاقة جنس يعني الجنس جواك طبيعي بلاش تحاربه ولا تحتقر منه .. كل لما تحس بمشاعر جنسية حاول تفهمها وتحتضتنها واعرف انها سبب مشاكل في التربية والبيئة مش أكتر .. وان الطبيعي الجنس والمشاعر الجنسية متحسهاش كل يوم ولا كل اسبوع ممكن مرة في كل شهر او شهرين .. وإن المشاعر الجنسية مش بتطلع أوي وبتزيد جواك إلا بعد لما بتقع في الحب .. لأن الجنس جواك مرتبط بالحب .. ودا من أيام الطفولة .. الفكرة كبيرة أوي أتمني أن الكلام دا يكون فادك شوية .. وإن شاء الله في رواية رحلة طفل يبحث عن حياة .. هفصل الفكرة اكتر ..

المهم عيش حياتك .. عيش اللحظة وبس .. ومتحطش هدف زي ما بتوع التنمية البشرية بيقولولك لأنك أول لما هتحط هدف هتعيش في الماضي وهتقفل نفسك علي الحياة وعلي الفرص اللي ممكن تجيلك منها .. عاوز تحط هدف حط .. بس عيش اللحظة الحالية بكل جوارحك بكامل قلبك .. لأن اللحظة الحالية هي اللي بيتولد فيها الفرص والإلهام والإبداع ... أريدك أن ترقص علي ألحان قلبك .. وتعزف موسيقى قلبك للعالم من حولك .. ليعلموا أن هناك إنسان حي بينهم ..

- سؤال قد يبادر ذهنك أنا ليه مطلع لساني في الصورة ?? ..
دي رسالة مني للواقع: أحا شوفت أديني فشختك 

يارب نكون كلنا فهمنا الموضوع



لست شخصا [ندعوك للتسجيل في المنتدى أو التعريف بنفسك لمعاينة هذا الرابط] ..
لكننى لا [ندعوك للتسجيل في المنتدى أو التعريف بنفسك لمعاينة هذا الرابط] و لا [ندعوك للتسجيل في المنتدى أو التعريف بنفسك لمعاينة هذا الرابط] ..
و لا [ندعوك للتسجيل في المنتدى أو التعريف بنفسك لمعاينة هذا الرابط] أحد بأشياء [ندعوك للتسجيل في المنتدى أو التعريف بنفسك لمعاينة هذا الرابط] ..
avatar
عابر سبيل
مدير الموقع
مدير الموقع

الجنس : ذكر
الدوله : مصر
المهنه :
الهوايه :
نوع المتصفح :
الحاله :
عدد المساهمات : 270
نقاط : 754
السٌّمعَة : 9
تاريخ الميلاد : 01/01/1995
تاريخ التسجيل : 07/09/2015

معاينة صفحة البيانات الشخصي للعضو http://progromatic.ahlamontada.com

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى